01 Oct O paso da empresa Biscuits Galicia polo programa Re-acciona: Entrevista a Pablo Troncoso, socio administrador
Biscuits Galicia é unha fábrica de galletas, pastas e madalenas “made in Galicia”, cunha sólida presenza tanto en España como no estranxeiro.
O seu proceso produtivo combina as técnicas de elaboración artesás da tradición reposteira galega coa última tecnoloxía no sector da pastelería. É por iso que as súas galletas e madalenas presentan un sabor único, suave e inconfundible, capaz de cativar o padal máis esixente.
Entrevistamos a Pablo Troncos, socio administrador de Biscuits Galicia para que nos achegue a súa experiencia no programa Re-acciona, concretamente, co servizo de mellora da produción.
1. Por que xorde a necesidade de participar no programa Re-acciona?
Detectamos a necesidade de reorganizar a metodoloxía produtiva para adaptarse aos crecentes requirimentos de axilidade e variedade que impón o mercado. Neste sentido, vimos no programa Re-acciona unha grande oportunidade para acometer estes cambios.
2. Como se desenvolveu o servizo solicitado?
Xunto co axente colaborador realizamos un proxecto moi completo que abarcou aspectos fundamentais da cadea produtiva, como son, entre outros: a metodoloxía de almacenamento e stock de produto terminado, a secuencia óptima de programación da produción, os cambios na metodoloxía de compras e aprovisionamentos, a eliminación de tempos improdutivos e melloras de rendemento de procesos críticos.
3. Que supuxo para a empresa o programa Re-acciona?
A participación no programa Re-acciona axudounos a repensar todos os procesos do fluxo loxístico, dende a entrega á clientela ata a compra de mercadorías. Deste xeito, conseguimos non só gañar tempo produtivo e axilidade para responder á demanda de forma máis dinámica, senón unha reorganización do almacén que tivo como consecuencia unha liberación de espazo.
Podes ver a entrevista completa na nosa canle en Youtube na seguinte ligazón.