03 Oct Por que os millenials son líderes no emprendemento?
Unha das xeracións de traballadores das que, sen dúbida ningunha, se fala con frecuencia na actualidade é a dos millenials. Estamos a falar de xente nova de entre 20 e 35 anos que, segundo o estudo BNP Paribas Global Entrepreneur Report 2016, pon en marcha unha media de oito empresas, fronte ás 3,5 que crean os denominados baby boomers (50-65 anos).
A pesar de que os millenials contan cunha curta experiencia laboral se os comparamos con profesionais de maior idade, estes teñen unha alta capacidade de emprender e un nivel de éxito alto neste proceso. Pero, cales son as razóns da súa relación estreita co emprendemento?
- O espírito colaborativo que está presente nas súas relacións con outros profesionais, pois entenden o mundo empresarial como un escenario onde todos teñen algo que dicir (exemplo, espazos de coworking).
- A alta formación e cualificación da que dispoñen, o que fai que sexa unha das xeracións máis preparadas da historia.
- A súa aposta por emprender, motivada pola busca dun mellor posto de traballo no que se aproveiten todas as súas capacidades e no que posúan maior poder de decisión.
- A súa predisposición a afrontar riscos nos negocios, favorecida polo ambiente de protección no que se criaron, amparados en maior medida polos seus proxenitores se os comparamos con xeracións anteriores.
- O alto grao de dixitalización que posúen, que lles outorga un acceso maior á información e ao coñecemento, así como a posibilidade de relacionarse con calquera punto do mundo grazas ás redes sociais. Ademais, os avances tecnolóxicos e a innovación, que para eles son algo normal e habitual, favorecen a súa adaptación aos cambios.
- O sentido de responsabilidade nos negocios, motivada, a miúdo, por non cometer os mesmos erros dos seus proxenitores, especialmente no que respecta a evitar os endebedamentos.
As características destes traballadores fan que moitas empresas queiran contar con eles no seu cadro de persoal, pero é importante considerar as súas altas expectativas para poder atraelos e manter este talento na empresa. Contas con millenials entre os teus traballadores?
Fontes: www.emprendedores.es; www.entrepreneur.com