fbpx

Re-acciona & TIC: 18 servizos para a mellora da competitividade das empresas galegas

Re-acciona & TIC: 18 servizos para a mellora da competitividade das empresas galegas

Este luns, 19 de setembro de 2016, a Cidade da Cultura de Santiago acollía o lanzamento da última convocatoria do programa Re-acciona e a presentación do novo Re-acciona TIC, na que participaron máis dun cento de persoas.

Re-acciona, que xa vai pola terceira edición, púñase en marcha no ano 2012. Con este un programa, o Igape busca dar resposta ás necesidades de mellora e profesionalización das pemes da nosa comunidade. Está composto por un total de once servizos cuxo obxectivo é a capacitación das pemes ante os novos retos do mercado, para dotalas de valor engadido que permita acelerar os seus procesos de mellora e incorporar novos coñecementos ás súas estruturas.

Os devanditos servizos (análise do potencial competitivo; optimización financeira; plan de futuro empresarial; desenvolvemento de plans de acción; plans e protocolos de empresa familiar; redes de cooperación; transformación de negocio; mellora da produción e a cadea loxística; relanzamento comercial; xestión por procesos; e imaxe e comunicación) contan co asesoramento e a implicación de once empresas de relevante notoriedade nos seus respectivos ámbitos de actuación.

Empresas referentes, como Casa Grande de Xanceda, Agroamb ou o Real Club Deportivo da Coruña, contaron en primeira persoa a súa experiencia Re-acciona e manifestaron a efectividade e a satisfacción lograda coa incorporación dalgún destes servizos na súa organización, e destacaron que se trata de servizos baseados na implicación do equipo, sinxelos de entender e orientados á aprendizaxe.

A novidade principal deste 2016 é o nacemento dun programa complementario baseado na filosofía do programa principal, o Re-acciona TIC, resultado da colaboración entre o Igape e a Amtega e cuxa primeira edición está a piques de arrancar.

A diferenza do Re-acciona, o Re-acciona TIC céntrase na mellora da competitividade das empresas a través de sete servizos TIC: aplicación de solucións dixitais, posta en marcha de solucións Industria 4.0, xeración de modelos e simulación industrial, aplicación de solucións en mobilidade, aplicación de solucións dixitais innovadoras, estratexias de marketing dixital e aplicacións de solucións Industria 4.0.

Agárdase que entre finais do mes de setembro e principios de outubro se abra a convocatoria para solicitar os servizos do Re-acciona TIC. Mentres tanto, se a vosa peme está interesada en solicitar algún dos servizos de Re-acciona, xa se atopa aberta a segunda convocatoria. Podedes consultar toda a información na seguinte ligazón.